habaru page ad two

ދިވެހިރާއްޖޭގެ މޫސުމާ ބެހޭ ޤައުމީ އިދާރާ (މެޓު އޮފީސް) އިން މިއަދު ވިދާޅުވެފައިވަނީ، ކުރިއަށް އޮތް ހަފުތާގައިވެސް ދުންފުހުގެ އަސަރު ރާއްޖެއަށް ކުރަމުންދާނެކަމަށާއި، މިކަމުގެ ސަބަބުން ލޮލަށް ފެންނަ ދުރުމިން ދަށްވެ، ވައި ނުސާފުވާނެ ކަމަށެވެ.

މެޓު އޮފީހުން ވިދާޅުވި ގޮތުގައި، ދުންފުހުގެ ސަބަބުން އުތުރާއި މެދު ރާއްޖެ ތެރޭގައި މިހާރުވެސް ވައި ނުސާފުވެ، ހަމަ ލޮލަށް ސާފުކޮށް ފެންނަ ދުރުމިން ދަށްވެފައިވެއެވެ. ކުރިއަށް އޮތް ހަފުތާގެ ތެރޭގައިވެސް މި ހާލަތު ދެމިއޮންނާނެކަމަށް ބެލެވޭ ކަމަށް އެ އިދާރާއިން ވަނީ ހާމަކުރައްވާފައެވެ.

މިވަގުތު ރާއްޖޭގައި ދުރު ފެންނަ މިންވަރު ނުވަތަ ވިސިބިލިޓީ ހުރީ 5 ކިލޯ މީޓަރުގައެވެ. މެޓު އޮފީހުން ފާހަގަކުރެއްވި ގޮތުގައި، މީގެކުރީގެ ބައެއް އަހަރުތަކުގައި މި މިންވަރު 5000 މީޓަރު އަދި ބައެއް ފަހަރު 4000 މީޓަރަށްވެސް ދަށަށް ގޮސްފައިވެއެވެ.

އިރުވައި މޫސުމާ ކައިރި ދުވަސްވަރު މިފަދަ ހާލަތްތައް ކުރިމަތިވުން އާދަޔާ ހިލާފެއް ނޫން ކަމަށާއި، މިދިޔަ އަހަރުވެސް އިރުވައި މޫސުމާއި ކައިރި ދުވަސްވަރު ރާއްޖޭގައި ދުރު ފެންނަ މިންވަރު ދަށަށް ގޮސްފައިވާ ކަމަށް މެޓު އޮފީހުން ވަނީ ބުނެފައެވެ.

ވައި ނުސާފުވެ، ކުރިއަށް އޮތް ހަފުތާގައިވެސް ދުންފުހުގެ އަސަރުކުރާނެކަމަށް މެޓުން ބުނެފި

ޕަބްލިކް ސާވިސް މީޑިއާ (ޕީއެސްއެމް) ގެ މެނޭޖިން ޑިރެކްޓަރުގެ މަގާމަށް، ދިވެހި މީޑިއާ ދާއިރާގެ ތަޖުރިބާކާރު އަޙުމަދު ޝަކީބް (ޝަކިއްބެ) މިއަދު އައްޔަންކޮށްފި އެވެ. ޝަކީބަކީ މި ސަރުކާރުން ޕީއެސްއެމްގެ އެމްޑީގެ މަގާމަށް އައްޔަންކުރި ހަތަރުވަނަ ފަރާތެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ހާމަކުރެއްވި ގޮތުގައި، ޓީވީއެމްގެ ޕްރެޒެންޓަރެއްގެ ގޮތުގައި ގިނަ ދުވަސްތަކެއް ވަންދެން މަސައްކަތް ކުރެއްވި ޝަކީބް ދައުލަތުގެ މީޑިއާގެ މެނޭޖިން ޑިރެކްޓަރުގެ މަގާމަށް އައްޔަންކުރައްވާފައިވަނީ، ކުރިން އެ މަގާމު ފުރުއްވި އިބްރާހިމް ނަސްރީން މިދިޔަ ނޮވެމްބަރު 29 ގައި އިސްތިއުފާ ދެއްވުމުން ހުސްވި މަގާމަށެވެ.

ޝަކީބަކީ ދިވެހި މީޑިއާ ދާއިރާގައި ގިނަ ދުވަސްތަކެއްގެ ތަޖުރިބާ ހުރި ފަރާތެކެވެ. ރައީސް ޑރ. މުހައްމަދު މުއިއްޒުގެ ހާއްސަ ޕޮޑްކާސްޓް އެންމެ ފަހުން ހުށަހަޅުއްވަމުން ގެންދެވި ޝަކީބް ވަނީ ޓީވީއެމްގެ "ތިޔަބޭފުޅުންގެ ފުރުސަތު"، "އެހާރާއި މިހާރު"، "އެހަނދާނުގައި"، "ހޭޔަންބޯ" އަދި "ދިވެހިރާއްޖޭގެ އެންމެ އަލިގަދަ ތަރި" ފަދަ ބޮޑެތި ޓީވީ ޝޯތައް ހުށަހަޅުއްވައި ދެއްވައިފަ އެވެ.

މީޑިއާ ދާއިރާގެ އިތުރުން، ޝަކީބް އެންމެ ގިނަ ދުވަސް ވަންދެން މަސައްކަތް ކުރެއްވީ ޑިޕާޓްމަންޓު އޮފް ޕަބްލިކް އެގްޒެމިނޭޝަން (ޑީޕީއީ) ގަ އެވެ. އެ ތަނުގެ ޑިރެކްޓަ ޖެނެރަލްގެ މަގާމުގައި ހުންނަވަނިކޮށް ބަދަލުކުރީ ނެޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ) އަށެވެ. އެއާ އެކު، މިދިޔަ އަހަރުގެ ޖުލައި މަހު ތައުލީމީ ދާއިރާ އިން އޭނާ ރިޓަޔާ ކުރެއްވީ އެވެ.

ޕީއެސްއެމްގެ މެނޭޖިން ޑިރެކްޓަރަކަށް އަޙުމަދު ޝަކީބް އައްޔަންކޮށްފި

މާލޭ ބޮޑުތަކުރުފާނު މަގުގެ ބޭރު މަގު ތަރައްގީ ކުރުމުގެ މަޝްރޫއުގެ ދަށުން އިއްޒުންދީން ފާލަމާ ދިމާލުން ހަދާ ބައިގެ ތާރު އެޅުމުގެ މަސައްކަތް އެއްކޮށް ނިންމައި އާއްމުންނަށް ހުޅުވާލައިފިއެވެ. މި މަގު ހަތަރު ލޭނަކަށް ތަރައްގީ ކޮށްފައިވާއިރު، މިކަމަށް ގިނަ ބަޔަކު ސޯޝަލް މީޑިޔާ މެދުވެރިކޮށް ހިތްހަމަޖެހުން ފާޅުކޮށްފައިވެއެވެ.

ލޯކަލް މާރުކޭޓް ސަރަހައްދުން ފެށިގެން ހުޅުމާލޭ ފެރީ ޓާމިނަލްއާ ހަމައަށް ތަރައްގީ ކުރަން ހަމަޖެހިފައިވާ ބޭރު މަގު ސެގްމަންޓުތަކަށް ބަހާލައިގެން ހެދުމުގެ އަމަލީ މަސައްކަތް ފަށާފައިވަނީ މިދިޔަ އަހަރުގެ އޮގަސްޓް މަހުގެ 21 ވަނަ ދުވަހުގައެވެ. ތިން ސެގްމަންޓަކަށް ބަހާލައިގެން ކުރިއަށްގެންދާ މި މަސައްކަތުގެ ދަށުން ފުރަތަމަ ބައި ނިންމައި އާއްމުންނަށް ހުޅުވާލާފައިވާއިރު، މި ބައިގެ ދަށުން 830 މީޓަރުގެ މަގުގައި ތާރު އެޅުމާއި، 4 ލޭންއަށް މަގު ހެދުމާއި، ދުވާރުތައް ހެދުމުގެ އިތުރުން ފެން ހިންދާ ނިޒާމެއް ވެސް ވަނީ ގާއިމުކޮށްފައެވެ. މީގެ އިތުރުން، ސަބްބޭސް ތައްޔާރު ކުރުމާއި ހިނގާ މީހުންނަށް ވަކި ލޭނެއް ވެސް މި މަޝްރޫއުގެ ދަށުން ގާއިމު ކުރެވިގެންދާނެއެވެ.

ފުރަތަމަ މި މަޝްރޫއުގެ ތާވަލުގައި ލޯކަލް މާރުކޭޓް ސަރަހައްދުގެ މަގު ތަރައްގީކުރުން ހިމެނިފައިނުވި ނަމަވެސް، ފަހުން އެ ސަރަހައްދުގެ ބޭރު މަގު ވެސް ތަރައްގީ ކުރަން ހަމަޖެހިފައިވާ ކަމަށް ކަމާބެހޭ ފަރާތްތަކުން ހާމަކުރެއެވެ. ދެން އޮތީ މި ސެގްމަންޓުގެ މަސައްކަތް ފެށުމެވެ. ރައީސް ޑރ. މުހައްމަދު މުޢިއްޒު ވަނީ، މި ސެގްމަންޓުގެ މަސައްކަތް ކުރިއަށް އޮތް ރަމަޟާން މަހުގެ ކުރިން ނިންމާލެވޭތޯ މަސައްކަތް ކުރަމުންދާ ކަމަށް ވިދާޅުވެފައެވެ.

ނިމިދިޔަ އޭޕްރީލް މަހު އެމްޓީސީސީއާ ހަވާލުކޮށްގެން ކުރިއަށް ގެންދާ މި މަޝްރޫއުގެ ޖުމްލަ އަގަކީ 144 މިލިއަން ރުފިޔާއެވެ. މި މަޝްރޫއުގެ ސަބަބުން މާލޭގެ ދަތުރުފަތުރުގެ ނިޒާމަށް އިތުރު ފަސޭހަތަކެއް ލިބި، ރައްޔިތުންނަށް ދިމާވާ ދަތުރުފަތުރުގެ ދަތިތަކަށް ހައްލެއް ލިބިގެންދާނެ ކަމަށް ބެލެވެއެވެ. އިތުރުކޮށްލާ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެރިކަމާއި ހަވާލުވި ފަހުން ރައްޔިތުންނަށް ބޭނުން ތެރި ބޮޑެތި ބަދަލުތައް ފެނެއެވެ.

ބޭރު މަގު ތަރައްގީ ކުރުމުގެ ފުރަތަމަ ބައި ހުޅުވައިފި: އާއްމުންގެ ބޮޑު ހިތްހަމަޖެހުމެއް

މިދިޔަ އަހަރުގެ ޑިސެންބަރު މަހުގެ 12 ވަނަ ދުވަހު އޭރު ތިން ވުޒާރާއެއް ހިންގަމުންދިޔަ އިމާރާތްތަކުގައި ހިނގި އަލިފާނުގެ ހާދިސާގައި ލިބުނު ގެއްލުންތަކުން އަރައިގަތުމަށް، ޗައިނާ ސަރުކާރުން 2.8 މިލިޔަން ޑޮލަރުގެ އެހީއެއް ދިވެހި ސަރުކާރަށް ދެއްވައިފިއެވެ. މި އެހީގައި ހާދިސާގައި ގެއްލުނު ތަކެތީގެ ބަދަލުގައި ބޭނުންވާ އޮފީސް ސާމާނާއި ފަރުނީޗަރު ހިމެނެއެވެ.

މިދިޔަ އަހަރުގެ ޑިސެމްބަރު 12 ވަނަ ދުވަހުގެ ރޭ ދިވެހިރާއްޖޭގެ އަޑުގެ އިމާރާތް ކުރިމަތީގައި ހުރި އިމާރާތުގައި އަލިފާން ރޯވިއިރު، އެ އިމާރާތުގައި އޭރު ހިންގަމުންދިޔައީ ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާއާއި އިމާރާތްކުރުމާއި ބިނާރާ ބެހޭ ވުޒާރާއެވެ. 

މީގެ އިތުރުން، އެ އިމާރާތާ ޖެހިގެން ހުރި ގްރީން ބިލްޑިންގައި ވެސް އަލިފާން ރޯވެ، އެތަނުގައި ހިންގަމުންދިޔަ މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއާއި އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ) އަށް ވެސް ވަނީ ބޮޑެތި ގެއްލުންތަކެއް ލިބިފައެވެ. މި ހާދިސާގައި މި އިމާރާތްތައް ބޭނުން ނުކުރެވޭ ވަރަށް އަނދާފައިވާއިރު، މި ވުޒާރާތަކާއި އިދާރާގެ މަސައްކަތްތައް މިވަގުތު ކުރަމުންދަނީ ދަރުބާރުގޭގައެވެ.

ޗައިނާ ސަރުކާރުން ދެއްވި މި 2.8 މިލިޔަން ޑޮލަރުގެ އެހީ ދިވެހި ސަރުކާރާ ހަވާލުކޮށްދެއްވީ ރާއްޖެއަށް ކަނޑައަޅުއްވާފައި ހުންނަވާ ޗައިނާގެ ސަފީރު ކޮންގް ޒިންހުއާ އެވެ. ސަރުކާރުގެ ފަރާތުން އެހީއާ ހަވާލުވެވަޑައިގަތީ މާލީ ކަންކަމާ ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރެވެ.

އެހީ ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މާލީ ވަޒީރު މޫސާ ޒަމީރު ވިދާޅުވީ، ޗައިނާއިން ދެއްވި މި އެހީތެރިކަމުގެ ސަބަބުން ސަރުކާރުގެ މުހިންމު މަސައްކަތްތައް އަލުން ފެށުމަށް މުހިންމު ދައުރެއް އަދާކުރާނެ ކަމަށެވެ. އަދި މި އެހީތެރިކަން، ދެ ޤައުމުގެ ދެމެދު އޮތް ގާތް ގުޅުން ރަމްޒުކޮށްދޭކަމަށް ވެސް ވަޒީރު ފާހަގަކުރެއްވިއެވެ.

ވަޒީރުގެ ވާހަކަފުޅުގައި، ޢުމްރާނީ ގޮތުންނާއި އެނޫންވެސް ދާއިރާތަކަށް ޗައިނާއިން ރާއްޖެއަށް ދޭ އެހީތެރިކަމާއި ދޭ އެއްބާރުލުން ފާހަގަކުރައްވައި ޝުކުރުއަދާކުރެއްވިއެވެ. މީގެ އިތުރުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޗައިނާއަށް ކުރެއްވި ދަތުރުފުޅުތަކާއި، ޗައިނާގެ ރައީސް ޝީ ޖިންޕިންގއާ ބައްދަލުކުރެއްވުމުގެ ސަބަބުން ދެ ޤައުމުގެ ދެމެދު އޮތް އިތުބާރު އިތުރުވެ، އެ ގުޅުން ފުޅާވެފައިވާކަން ވެސް ވަޒީރު ފާހަގަކުރެއްވިއެވެ.

ވަޒީރު މޫސާ ޒަމީރު ވާހަކަފުޅު ނިންމަވާލައްވަމުން ޗައިނާއިން ދިން އެހީތެރިކަމަށް އަލުން ވެސް ޝުކުރުއަދާކުރައްވައި، ދެ ޤައުމަށް ވެސް ފައިދާވާނެ ގޮތަށް ޗައިނާއާ އެކު އޮތް ގާތް ގުޅުން އިތުރަށް ބަދަހިކުރުމަށް އަބަދުވެސް މަސައްކަތްކުރައްވާނެކަން ހާމަކުރެއްވިއެވެ.

ތިން ވުޒާރާގައި ހިނގި އަލިފާނުގެ ހާދިސާ: ޗައިނާއިން 2.8 މިލިޔަން ޑޮލަރު އެހީއެއް ދީފި

މަސްވެރިންގެ އިޙްތިޖާޖުގައި ފުލުހުންގެ ވާޖިބަށް ހުރަސްއެޅުމާއި ގުޅިގެން ދެ ދޯންޏާއި ތިން މީހަކު ފުލުހުންގެ ބެލުމުގެ ދަށަށް ގެންގޮސްފައިވާކަމަށް ދިވެހި ފުލުހުންގެ ޚިދުމަތުން މިއަދު ވިދާޅުވެއްޖެއެވެ. މިކަން ހާމަކުރައްވާފައިވަނީ ފުލުހުންގެ ރަސްމީ އިދާރާއިންނެވެ.

މަސްވެރިންގެ ދުވަހާއި ގުޅިގެން އިއްޔެއިން ފެށިގެން މާލޭގެ 4 ނަމްބަރު ޖެޓީ ކުރިމަތީގައި މަސްވެރިންތަކެއް އަންނަނީ އިޙްތިޖާޖްކުރަމުންނެވެ. މި އިޙްތިޖާޖުގެ މައިގަނޑު މަޤްޞަދަކީ މަސްވެރިކަމުގެ ދާއިރާގައި ހުރި ގޮންޖެހުންތަކާއި، ޚާއްސަކޮށް ބޮޑު ކަންނެލީގެ މަސްވެރިންނަށް ދިމާވާ ދަތިތަކަށް ސަރުކާރުގެ ސަމާލުކަން ހޯދުމެވެ.

މި އިޙްތިޖާޖުގައި ބައިވެރިވި ބައެއް ދޯނިތަކުގައި ބިދޭސީން ޙަރަކާތްތެރިވަމުންދާކަން ފާހަގަވުމާއި ގުޅިގެން، އެމީހުން މި އިޙްތިޖާޖުގައި ބައިވެރިނުވުމަށް ކަމާ ބެހޭ ފަރާތްތަކުންވަނީ އިލްތިމާސްކުރައްވާފައެވެ. ދިވެހި ފުލުހުންގެ ޚިދުމަތުން ވިދާޅުވީ، އިޙްތިޖާޖު ކުރާ ދޯނިތަކުގައި ބިދޭސީން ޙަރަކާތްތެރިނުވުމަށް ނަސޭޙަތްތެރިވީ ނަމަވެސް، ބައެއް ދޯނިތަކުގައި ބިދޭސީން ތިބިކަން ފާހަގަވުމާއި ގުޅިގެން، ފުލުހުންނާއި މޯލްޑިވްސް އިމިގްރޭޝަނުން އެ ދޯނިތަކުގައި މަސައްކަތްކުރާ ބިދޭސީންނާ ގުޅޭ މަޢުލޫމާތު ހޯދުމަށް މަސައްކަތް ކުރަމުންދާކަމަށެވެ. އެގޮތުން، އިޙްތިޖާޖުގައި ބިދޭސީން ޙަރަކާތްތެރިވަމުންދާކަމަށް ފާހަގަކުރެވޭ ދޯނިތަކަށް ފުލުހުން މިއަދު އަރާފައިވާ ކަމަށް ފުލުހުން ވިދާޅުވެއެވެ.

މި އިޙްތިޖާޖާއި ގުޅިގެން މިހާތަނަށް ދެ ދޯންޏެއް ފުލުހުންގެ ބެލުމުގެ ދަށަށް ގެންގޮސްފައެވެ. އަދި ފުލުހުންގެ ވާޖިބަށް ހުރަސް އެޅިކަމުގެ ތުހުމަތުގައި ތިން މީހަކުވެސް ފުލުހުންގެ ބެލުމުގެ ދަށަށް ގެންގޮސްފައިވާކަމަށް ފުލުހުން ވިދާޅުވެއެވެ. އޭގެތެރޭގައި ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މަޢުރޫފް ޒާކިރުވެސް ހިމެނޭކަމަށް ފުލުހުން ހާމަކުރައްވައެވެ.

ބޮޑު ކަންނެލީގެ މަސްވެރިންގެ މި އިޙްތިޖާޖާއި ގުޅިގެން މަސްވެރިންގެ ހުރި ކަންބޮޑުވުންތައް ހައްލުކުރުމަށް ސަރުކާރުން މަސައްކަތް ކުރަމުންދާކަމަށް މަސްވެރިކަމާއި ބެހޭ ވުޒާރާއިންވަނީ ވިދާޅުވެފައެވެ. އެގޮތުން، މަސްވެރިންނަށް ފަސޭހައިން އަގުހެޔޮކޮށް ތެޔޮ ލިބޭނެ އިންތިޒާމު ހަމަޖެއްސުމަށް މަސައްކަތް ކުރަމުންދާއިރު، ކަންނެލި މަސްވެރިންނަށް ޚާއްސަ މަސް ޕްރޮސެސްކުރާނެ ފެސިލިޓީއެއް ހުޅުމާލޭގައި ޤާއިމުކުރުމުގެ މަސައްކަތްވެސް ކުރަމުންދާކަން ސަރުކާރުންވަނީ ހާމަކުރައްވާފައެވެ.

މަސްވެރިންގެ އިޙްތިޖާޖް: 2 ދޯންޏާއި 3 މީހަކު ފުލުހުންގެ ބެލުމުގެ ދަށަށް

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ބައިނަލްއަޤްވާމީ އެންޓި-ކޮރަޕްޝަން ދުވަހުގެ މުނާސަބަތުގައި ރައްޔިތުންނަށް ފޮނުއްވި މެސެޖެއްގައި، ކޮރަޕްޝަނަށް މި ސަރުކާރުން އެއްވެސް ޖާގައެއް ނުދޭނެކަމަށް ވިދާޅުވެއްޖެއެވެ. މި މެސެޖުގައި އެމަނިކުފާނު ވަނީ، ކޮރަޕްޝަނަކީ ޤައުމުގެ ތަރައްޤީއަށާއި، ޤާނޫނުގެ ވެރިކަމަށް ހުރަސްއަޅާ ނުރައްކަލެއްކަން ފާހަގަކުރައްވާ، އެކަމާ ދެކޮޅަށް ސަރުކާރުން އަޅުއްވަމުން ގެންދަވާ ފިޔަވަޅުތަކުގެ މައްޗަށް އަލިއަޅުއްވައިލައްވާފައެވެ.

ރައީސްގެ މެސެޖުގައި، ނިޒާމީ ކޮރަޕްޝަނުގެ ސަބަބުން ޤާނޫނުގެ ވެރިކަން ފުނޑުފުނޑުވެ، ދެމެހެއްޓެނިވި ތަރައްޤީއަށް ހުރަސްއެޅި، ޑިމޮކްރެޓިކް ނިޒާމު ބަލިކަށިވެ، ރައްޔިތުންގެ އަސާސީ ޙައްޤުތައް ނިގުޅައިގަނެވޭކަން ފާހަގަކުރެއްވިއެވެ. އަދި، ކޮރަޕްޝަނަށް މި ސަރުކާރުން އެއްވެސް ޖާގައެއް ނުދެއްވާނެކަމަށާއި، ކޮރަޕްޝަނާއި ފަސާދައިގެ ނުރައްކަލާ ދެކޮޅަށް ރާއްޖެއިން ގިނަ މަސައްކަތްތަކެއް ކުރައްވަމުން ގެންދަވާކަމަށް ރައީސް ވިދާޅުވިއެވެ.

ސަރުކާރުގެ ޚިދުމަތްތައް ޒަމާނީ ފެންވަރަށް ގެނައުމަށާއި، ސަރުކާރުގެ މުޢާމަލާތްތަކުގައި ދެފުށް ފެންނަ ގޮތަށް ކަންކަން ހިންގުން ހަރުދަނާ ކުރުމުގެ މަޝްރޫޢެއް ކަމުގައިވާ، މޯލްޑިވްސް 2.0 ޑިޖިޓަލް ޓްރާންސްފޯމޭޝަން ޕްރޮޖެކްޓްގެ މައްޗަށް ރައީސްގެ މެސެޖުގައި އަލިއަޅުއްވައިލެއްވިއެވެ. މީގެ އިތުރުން، ޤާނޫނުލްޢުޤޫބާތަށް ގެނެވުނު ބަދަލުތަކުގެ ތެރެއިން އެސެޓް ރިކަވަރީގައި އެންޓި ކޮރަޕްޝަން ކޮމިޝަނުން ކުރާ މުހިންމު މަސައްކަތްތަކަށްވެސް އެމަނިކުފާނު އަލިއަޅުއްވައިލެއްވިއެވެ.

ރައީސްގެ މެސެޖުގައި، ނޭޝަނަލް އެންޓި-ކޮރަޕްޝަން ޕްލޭނާ އެއްގޮތްވާ ގޮތުގެ މަތިން ކުރިއަށް ރޭވިފައިވާ ބައެއް މުހިންމު މަސައްކަތްތައްވެސް ވަނީ ފާހަގަކުރައްވާފައެވެ. އެގޮތުން 20 އަހަރުގެ ޤައުމީ ތަރައްޤީގެ ޕްލޭނާއި، ”ހިންމި“ ކޮރަޕްޝަން ރިސްކް ސެލްފް އެސެސްމަންޓް ޓޫލްކިޓް ތަޢާރަފްކުރުން ހިމެނެއެވެ. ސަރުކާރުގެ މުއައްސަސާތަކަށް ތަމްރީނު ލިބިފައިވާ ހަރުދަނާ ފަންނީ މުވައްޒަފުން ލިބޭނެ އިންތިޒާމު ހަމަޖެއްސުމަށް ޚާއްޞަ އެންޓި-ކޮރަޕްޝަން އެކަޑަމީއެއް އުފެއްދެވުންވެސް މި މަސައްކަތްތަކުގެ ތެރޭގައި ހިމެނެއެވެ.

އިޖްތިމާޢީ ޒިންމާދާރުކަމާއި، ބައިނަލްއަޤްވާމީ ގުޅުންތައް އިތުރަށް ބަދަހިކުރުމުގައި، މަދަނީ ޖަމްޢިއްޔާތަކާއި، ޔޫ.އެން.ސީ.އޭ.ސީ.ގެ ރިވިއު މެކޭނިޒަމްތަކުގެ ތެރެއިން ކުރައްވަމުން ގެންދަވާ މަސައްކަތްތައް ފާހަގަކުރައްވައި، އެކަމަށްޓަކައި ރައީސުލްޖުމްހޫރިއްޔާގެ މެސެޖުގައި ޝުކުރު އަދާކުރެއްވިއެވެ. ނަމަވެސް، ކޮރަޕްޝަނާ ދެކޮޅަށް މަސައްކަތްކުރުމުގައި ހަމައެކަނި ސަރުކޫރުން އަޅާ ފިޔަވަޅުތަކަކުން ފުއްދާލެވެން ނެތްކަމަށާއި، އަމިއްލަ ފަރުދުންނާއި އަމިއްލަ ފަރާތްތަކުގެ ބައިވެރިވުމަކީ ކޮންމެހެން ބޭނުންތެރި ކަމެއްގެ ގޮތުގައި ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ މެސެޖު ނިންމަވާލެއްވީ، ޤައުމަށް އަމާނާތްތެރިވުމާއި، އިޚްލާޞްތެރިވުމާއި، ދެފުށް ފެންނަ އުސޫލުތައް ދެމެހެއްޓުމަކީ، ޤައުމުގެ އެންމެން ގުޅިގެން އަދާކުރަންޖެހޭ ވާޖިބެއްކަން ފާހަގަކުރައްވަމުންނެވެ. އަދި، ނަޒާހަތްތެރިކަމާއި، ޑިމޮކްރެޓިކް ވެރިކަން ހަރުދަނާކޮށް، ޤާނޫނުގެ ވެރިކަން ނަގަހައްޓައި، ހަމަހަމަކަމާއެކު ޢަދުލު އިންޞާފު ޤާއިމުކުރާ ޤައުމެއްގެ ގޮތުގައި މި ސަރުކާރުން އަބަދުވެސް މަސައްކަތް ކުރައްވާނެކަމުގެ ޔަޤީންކަން އެމަނިކުފާނު ތަކުރާރުކޮށްދެއްވިއެވެ.

ކޮރަޕްޝަނަށް މި ސަރުކާރުން އެއްވެސް ޖާގައެއް ނުދޭނެ: ރައީސް މުއިއްޒު

މާލެ ސިޓީ ކައުންސިލްގެ މި ހަފްތާގެ ޖަލްސާ ކޯރަމް ހަމަނުވުމުގެ ސަބަބުން ކުރިއަކަށް ނުގެންދެވި ކެންސަލްކޮށްފިއެވެ. މިއީ ސިޓީ ކައުންސިލްގެ ޖަލްސާތައް ކޯރަމް ހަމަނުވެގެން ނުވަތަ އެހެނިހެން ސަބަބުތަކާހުރެ ކެންސަލްވާ ދެވަނަ ހަފްތާއެވެ.

މޭޔަރު އާދަމް އާޒިމް ޖަލްސާ ފެށުމަށްފަހު ވަނީ ޖަލްސާ ކުރިއަށް ގެންދެވޭނެ އަދަދަށް މެންބަރުން ހާޒިރުނުވާ ކަމަށް ވިދާޅުވެ ޖަލްސާ ނިންމާލައްވާފައެވެ. އާޒިމް ވިދާޅުވި ގޮތުގައި ކައުންސިލް ޖަލްސާއަށް ހާޒިރުވީ ޖުމްލަ ހަތް ބޭފުޅުން ކަމަށާއި އޮންލައިންކޮށް އެއް ބޭފުޅަކު ބައިވެރިވެވަޑައިގެންނެވި ކަމަށެވެ. ޖަލްސާ ކުރިއަށް ގެންދިއުމަށް 10 މެންބަރުން ބޭނުންވާއިރު، ހާޒިރުވީ ޖުމްލަ އަށް މެންބަރުން ކަމަށް އާޒިމް ފާހަގަކުރެއްވިއެވެ.

"މިއަދުގެ ކޯރަމަކީ 10. އެހެންނަމަވެސް ހާޒިރުވެ ތިއްބެވީ ޖުމްލަ ހަތް ބޭފުޅުން. އޮންލައިންކޮށް އެއް ބޭފުޅަކު. އެހެންވީމަ ޖުމްލަ އަށެއް މިވަނީ. އެހެންވީމަ ކޯރަމް 10 އަކަށްވާތީވެ، ކޯރަމް ހަމަނުވާތީވެ މިއަދުގެ ޖަލްސާ ކުރިއަށް ނުގެންދެވޭނެތީވެ މިއަދުގެ ޖަލްސާ އަޅުގަނޑު ނިންމާލަން،" މޭޔަރު އާދަމް އާޒިމް ވިދާޅުވިއެވެ.

މާލެ ސިޓީ ކައުންސިލްގެ މިދިޔަ ހަފްތާގެ ޖަލްސާ ނިންމާލީ ވިލިމާލެ ދާއިރާގެ ކައުންސިލަރު، ނަހުލާ އަލީ މާލެ ސިޓީ ކައުންސިލުން ކުއްޔަށް ދޫކޮށްފައިވާ ބިންތަކެއްގެ އެގްރީމެންޓުތަކެއް ވީދާލި މައްސަލަ މޭޔަރު އާދަމް އާޒިމް ޖަލްސާގައި ހާމަކުރެއްވުމާއެކު ހޫނުވެ ކުރިއަށް ނުގެންދެވިގެންނެވެ. މޭޔަރާއެކު މާލެ ސިޓީ ކައުންސިލްގައި ޖުމްލަ 18 މެންބަރުން ތިއްބަވާއިރު، މިދިޔަ ޖަލްސާއަށް ވެސް ހާޒިރުވެފައިވަނީ ޖުމްލަ އަށް މެންބަރުން ކަމަށް ފާހަގަކުރެވެއެވެ.

މާލެ ސިޓީ ކައުންސިލްގެ ޖަލްސާތައް ކޮންމެ ހަފްތާއެއްގެ ބުދަ ދުވަހު ބާއްވާއިރު، މިދިޔަ ސެޕްޓެމްބަރު މަހާއި އޮކްޓޯބަރު މަހު ވެސް ބައެއް ޖަލްސާތައް ކޯރަމް ހަމަނުވެގެން ކުރިއަށް ގެންދެވިފައި ނުވެއެވެ.

ކޯރަމް ހަމަނުވެ މާލެ ސިޓީ ކައުންސިލްގެ ޖަލްސާ ކުރިއަށް ނުގެންދެވުނު

މީޑިޔާ ރިޕޯޓްތަކުން ދައްކާ ގޮތުގައި، ރަޝިޔާގެ ރަނުގެ ރިޒަރވްގެ އަގު މިހާތަނަށް ދުވަހަކުވެސް ނުދާ މަތީ ދަރަޖައަކަށް އަރާފައިވާ ކަމަށް އެ ގައުމުގެ ސެންޓްރަލް ބޭންކުން ހާމަކޮށްފިއެވެ. 

ނޮވެމްބަރު 30 ގެ ނިޔަލަށް އެއްކުރެވުނު ހިސާބުތަކުން ދައްކާ ގޮތުގައި، މި ރިޒަރވްތަކުގެ ޖުމްލަ އަގު ވަނީ 310.72 ބިލިއަން އެމެރިކާ ޑޮލަރަށް އަރާފައެވެ. މިއީ މީގެ އަހަރެއް ކުރިއާ އަޅާބަލާއިރު 57 އިންސައްތައިގެ ކުރިއެރުމެކެވެ.

ރަޝިޔާގެ ސެންޓްރަލް ބޭންކުން ހާމަކުރާ ގޮތުގައި، މިދިޔަ ހަތަރު މަސް ދުވަހުވެސް ވިދިވިދިގެން ރަނުގެ ރިޒަރވްތައް އިތުރުވެފައިވެއެވެ. 

މިހާރު ރަޝިޔާގެ ބައިނަލްއަޤްވާމީ ރިޒަރވްތަކުގެ 42 އިންސައްތައަށްވުރެ ބޮޑު ބައެއް ހިއްސާކުރަނީ ރަނުންނެވެ. މިއީ ފާއިތުވި 30 އަހަރުގެ ތެރޭގައި ރަނުން ހިއްސާކުރި އެންމެ ބޮޑު މިންވަރެވެ. ރަނާއި ބޭރު ފައިސާ ހިމެނޭ ގޮތަށް، ޖުމްލަ ރިޒަރވްތައް މިދިޔަ އަހަރާ އަޅާބަލާއިރު 19 އިންސައްތަ އިތުރުވެ، 734.59 ބިލިއަން ޑޮލަރަށް އަރާފައިވެއެވެ.

ވޯލްޑް ގޯލްޑް ކައުންސިލުން އެ ގައުމަކީ ތިންވަނަ ކުއާޓަރުގައި ދުނިޔޭގެ ފަސްވަނައަށް އެންމެ ބޮޑަށް ރަނަށް އިންވެސްޓުކުރާ ޤައުމު ކަމަށް ރޭންކުކޮށްފައިވެއެވެ. ރަޝިޔާގެ ރިޒަރވްގައި 2,329 ޓަނުގެ ރަން އެބަހުއްޓެވެ. މިއީ އެމެރިކާ، ޖަރުމަނު، އިޓަލީ އަދި ފަރަންސޭސިވިލާތަށްފަހު ދެވަނަ އަށް އެންމެ ގިނަ ރަން ރިޒަރވްގައި ހިފަހައްޓާ ޤައުމުތަކުގެ ތެރޭގައި ރަޝިޔާ ހިމެނޭ މިންވަރެކެވެ.

މި ރޭންކިންގްގައި ހަވަނަ މަގާމުގައި އޮތީ ޗައިނާއެވެ. ޗައިނާގެ ރިޒަރވްގައި 2,303 ޓަނުގެ ރަން ހުރިއިރު، އެ ޤައުމުގެ ޖުމްލަ ރިޒަރވްގެ 7.68 އިންސައްތަ އަކީ ރަނުގެ އަގެވެ.

ދުނިޔޭގައި އެންމެ ގިނަ ރަން ރިޒަރވްގައި ހިފަހައްޓާ ޤައުމަކީ އެމެރިކާއެވެ. އެ ޤައުމުގެ ރިޒަރވްގައި 8,133 ޓަނަށްވުރެ ގިނަ ރަން ހުރިއިރު، އެއީ އެމެރިކާގެ ޖުމްލަ ރިޒަރވްގެ 80 އިންސައްތައެވެ.

ރަޝިޔާގެ ރަނުގެ ރިޒަރވްގެ އަގު: ދުވަހަކުވެސް ނުދާހާ މައްޗަށް

ހުޅުމާލެ ދެވަނަ ފިޔަވަހީގައި އާބަން ޕްރައިމަރީ ހެލްތު ކެއަރ ނުވަތަ ޖެނަރަލް ޕްރެކްޓިސް (ޖީޕީ) ކްލިނިކެއް ތަރައްޤީކުރުމަށް ނިންމައި، މިކަމުގެ އެއްބަސްވުމެއްގައި ހުޅުމާލެ ހޮސްޕިޓަލާއި ފަހި ދިރިއުޅުން ކޯޕަރޭޝަން (އެފްޑީސީ) އާ ދެމެދު ވަނީ ސޮއިކޮށްފައެވެ. މި ކްލިނިކް ޤާއިމުކުރެވޭނީ ދެވަނަ ފިޔަވަހީގައި ތަރައްޤީކޮށްފައިވާ 4،000 ފުލެޓުގެ ތެރެއިން އަމާން އުދަރެހުގެ ޓަވަރެއްގައެވެ.

މާލެ ސިޓީ ގުރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގް ހަލީމް ވިދާޅުވީ، މި އެއްބަސްވުމުގެ ދަށުން އަމާން އުދަރެހުގެ ޓަވަރު ހަޔެއްގައި އާބަން ޕްރައިމަރީ ހެލްތު ކެއަރ ކްލިނިކެއް ތަރައްޤީކުރެވޭނެކަމަށެވެ. މީގެ މަޤްޞަދަކީ ހުޅުމާލެ ދެވަނަ ފިޔަވަހީގައި ދިރިއުޅޭ ރައްޔިތުންނަށް ޞިއްޙީ ޚިދުމަތްތަކަށް ފަސޭހައިން access ލިބޭނެ ގޮތް ހެދުމެވެ.

ސީއީއޯ އިބްރާހީމް އަބްދުއްރައްޒާގް ހަލީމް އިތުރަށް ވިދާޅުވީ، މިހާރުވެސް ހުޅުމާލެ ދެވަނަ ފިޔަވަހީގައި ހުޅުމާލެ ހޮސްޕިޓަލުން ޖީޕީ ކްލިނިކެއް ހިންގަމުންދާ ކަމަށެވެ. ނަމަވެސް އަލަށް ތަރައްޤީކުރާ ކްލިނިކުން އިތުރު ޚިދުމަތްތަކެއް ލިބޭނެއެވެ. އެގޮތުން ކުޑަކުދިންނަށް ވެކްސިން ދިނުމާއި ބަރުދަން ބެލުމާއި ކައުންސެލިންގެ ޚިދުމަތް މި ކްލިނިކުން ލިބޭނެއެވެ. މީގެ އިތުރުން އިތުރު ސްޕެޝަލިސްޓުންނަށް ދައްކަން ބޭނުންވެއްޖެ ހާލަތެއްގައި ޖީޕީ ކްލިނިކު މެދުވެރިކޮށް އަވަހަށް އެޕޮއިންޓްމަންޓް ލިބޭނެ ގޮތް ވެސް ހަމަޖެހޭނެކަމަށް އޭނާ ފާހަގަކުރެއްވިއެވެ.

"މީގެ ފައިދާ ހަމަ ޔަގީނުން ވެސް ރައްޔިތުންނަށް ވަރަށް ބޮޑަށް ކުރާނެ. އެއީ، ހޮސްޕިޓަލްތަކަށް ޖީޕީ ސަރވިސް ހޯދަން ވަޑައިގަތުމުގެ ބަދަލުގައި ޖީޕީ ކްލިނިކުން މި ޚިދުމަތް ހޯދާފައި އިތުރު ސްޕެޝަލިސްޓުންނަށް ދައްކަން ބޭނުންވެއްޖެ ހާލަތެއްގައި ޖީޕީ ކްލިނިކު މެދުވެރިކޮށް އަވަހަށް އެޕޮއިންޓްމަންޓް ލިބޭނެ ގޮތް ވެސް ހަމަޖެހޭނެ،" އިބްރާހީމް އަބްދުއްރައްޒާގް ހަލީމް ވިދާޅުވިއެވެ.

މި ކްލިނިކް ތަރައްޤީކުރަނީ، ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ނިންމެވުމާ އެއްގޮތަށް މާލެ ސަރަހައްދުގައި 6 ޖީޕީ ކްލިނިކް ޤާއިމުކުރުމުގެ މަސައްކަތުގެ ދަށުންނެވެ. އެއީ މާލޭގައި 4 ޖީޕީ ކްލިނިކާއި ހުޅުމާލޭގައި ތަރައްޤީކުރާ 2 ކްލިނިކެވެ. ހެންވޭރުގައި ޖީޕީ ކްލިނިކެއް ޤާއިމުކުރުމުގެ މަސައްކަތް ވަރަށް އަވަހަށް ފަށާނެކަމަށާއި މަސައްކަތް ކުރަނީ، އެ ކްލިނިކާއި ހުޅުމާލޭ ދެވަނަ ފިޔަވަހީގައި އަޅާ ކްލިނިކްގެ މަސައްކަތް އެއްކޮށް ނިންމައި ހުޅުވުމަށް ކަމަށްވެސް ސީއީއޯ ވިދާޅުވިއެވެ.

ހުޅުމާލެ ދެވަނަ ފިޔަވަހީގައި ހިޔާ ޓަވަރު 16ގައި ހިންގާ ޖީޕީ ކްލިނިކުން 24 ގަޑިއިރަށް ޚިދުމަތް ދޭން ފެށީ، މިދިޔަ ސެޕްޓެމްބަރު މަހުގެ ތެރޭގައެވެ. މިއީ ޞިއްޙީ ޚިދުމަތްތައް ފުޅާކުރުމަށް ސަރުކާރުން ކުރަމުންދާ މަސައްކަތުގެ ބައެކެވެ.

ޢާންމު ޞިއްޙަތުގެ ނިޒާމު ވަރުގަދަކުރެއްވުމުގެ ގޮތުން އަދުގެ ސަރުކާރުން މާލެ ސަރަޙައްދުގައި ޤާއިމުކުރެއްވި ފުރަތަމަ އަރބަން ޕްރައިމަރީ ހެލްތު ކެއަރ ސެންޓަރު ހުޅުވާފައިވަނީ މިިދިޔަ މަހުގައެވެ. މާލެ ސަރަޙައްދުގައި ތަރައްޤީކުރާ ޖީޕީ ކްލިނިކްތަކުގެ އިތުރަށް އަތޮޅުތެރޭގައިވެސް އެފަދަ ސެންޓަރުތައް ތަރައްޤީކުރުމަށް ވަނީ ހަމަޖެހިފައެވެ.

މާލޭގައި ހުޅުވި ފުރަތަމަ ޖީޕީ ކްލިނިކުން ޞިއްޙީ އާންމު މަޢުލޫމާތު ފޯރުކޮށްދިނުމާއި މެޑިކަލް ޗެކަޕްތައް ހެދުމާއި އާންމު ބަލިތަކަށް ބޭސްފަރުވާ ކުރުމުގެ ޚިދުމަތްތައް ދެމުން ގެންދެއެވެ. މި ސެންޓަރުގައި އާންމު ބަލިތަކަށް ފަރުވާ ދިނުމަށް ޖީޕީ ކްލިނިކަކާއި ކުޑަކުދިންގެ ހެލްތު ކްލިނިކާއި ވެލްނެސް ކްލިނިކެއް ވަނީ ޤާއިމްކޮށްފައެވެ. އެ ސެންޓަރުން ކޮންމެ ދުވަހެއްގެ ހެނދުނު 8:30 އިން ރޭގަނޑު 10 އާ ހަމައަށް ޚިދުމަތް ދޭއިރު، ކޮންމެ ހުކުރު ދުވަހެއްގެ މެންދުރުފަހު 3:30 އިން ރޭގަނޑު 10 އާ ހަމައަށް ޚިދުމަތް ދެއެވެ.

މި ސެންޓަރުގެ ޚިދުމަތް މައިގަނޑު ގޮތެއްގައި ބެހިފައި ވަނީ 3 ބަޔަކަށެވެ. އެއީ، އާންމު ބަލިތަކުގެ ޑޮކްޓަރުންނަށް ދެއްކުމާއި އިތުރުފަރުވާ ބޭނުންވާ ހާލަތްތަކުގައި ޚާއްޞަ ޑޮކްޓަރުންގެ ލަފާ ހޯދުމާއި ފަސޭހައިން ދެއްކޭ ޚާއްޞަ ޑޮކްޓަރުންނަށް ދެއްކުމުގެ އިންތިޒާމް ހަމަޖައްސައިދިނުމެވެ. އަދި ޢާންމު ޞިއްޙަތު ކުރިއެރުވުމަށް ޤައުމީ ފެންވަރުގައި ހިންގަވާ ޕްރޮގްރާމްތައްވެސް މި މަރުކަޒުގައި ކުރިއަށްގެންދެވޭނެއެވެ.

އަމާން އުދަރެހުގައި ޖީޕީ ކްލިނިކެއް ތަރައްޤީ ކުރަނީ

މިލަދުންމަޑުލު ދެކުނުބުރީ މަނަދޫގައި އަލަށް ޢިމާރާތްކުރި 700 މީހުންގެ ޖާގައިގެ މިސްކިތް ރަސްމީކޮށް ހުޅުވައިފިއެވެ. މި މިސްކިތް ހުޅުވައިދެއްވީ އިސްލާމީކަންތައްތަކާ ބެހޭ ވުޒާރާގެ ސްޓޭޓް މިނިސްޓަރ އަލްއުސްތާޛް ޢަބްދުﷲ ސަޢުދާން، އެރަށުގައި ބޭއްވި ޚާއްސަ ރަސްމިއްޔާތެއްގައެވެ.

މިސްކިތް ހުޅުވުމުގެ ރަސްމިއްޔާތުގައި އެރަށު ރައްޔިތުންނާއި ސަރުކާރުގެ އިސްވެރިން ބައިވެރިވެވަޑައިގެންނެވިއެވެ. މިސްކިތުގެ ޢިމާރާތުގެ މަސައްކަތް ކުރިއަށް ގެންދެވިފައިވަނީ ދަޢުލަތުގެ ބަޖެޓުން ޚަރަދުކޮށްގެން އަފާމީ މޯލްޑިވްސް ޕްރައިވެޓް ލިމިޓެޑާއި ހަވާލުކޮށެވެ. މި މަޝްރޫޢު ނިމި، ރަށުގެ ރައްޔިތުންނަށް ނަމާދުކުރުމަށް ފުރިހަމަ މިސްކިތެއް ލިބުމަކީ އެރަށުގެ ރައްޔިތުންނަށް ލިބުނު ބޮޑު ހިތްހަމަޖެހުމެކެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، ރާއްޖޭގެ އެކިކަންކޮޅުތަކުގައި ޢިމާރާތްކުރަން ފަށާފައިވާ މިސްކިތްތަކުގެ މަސައްކަތުގެ ދުވެލި އަވަސްކޮށް، ވީހާވެސް އަވަހަށް މަޝްރޫޢުތައް ނިންމުމަށް ގިނަ މަސައްކަތްތަކެއް ކުރަމުންދާ ކަމަށެވެ. އަދި ކުރިއަށް އޮތް ރަމަޟާން މަހުގެ ކުރިން 15 މިސްކިތެއް ހުޅުވުމަށް ތައްޔާރުވަމުންދާކަމަށް ވެސް ވުޒާރާއިން ވަނީ ހާމަކުރައްވާފައެވެ. މިކަމުގެ ސަބަބުން، ރަމަޟާން މަހުގެ ތެރޭގައި ރާއްޖޭގެ އެކި ކަންކޮޅުތަކުގައި ތިބި މުސްލިމުންނަށް ނަމާދުތައް ކުރުމަށް އިތުރު ފަސޭހަތަކެއް ލިބިގެންދާނެއެވެ.

މަނަދޫގައި 700 މީހުންގެ ޖާގައިގެ މިސްކިތެއް ހުޅުވައިފި

މާލޭ ސަރަހައްދުގައި ދިމާވެފައިވާ ވެހިކަލް ޕާކިންގެ ދަތިކަމަށް ވަގުތީ ހައްލެއް ހޯދައިދިނުމުގެ ގޮތުން، ހުޅުމާލޭގެ ހަތަރު ސަރަހައްދެއްގައި 1964 އުޅަނދު ޕާކްކުރެވޭނެ ޖާގަ ގާއިމްކޮށްފިއެވެ. މި މަސައްކަތަކީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ޓްރާންސްޕޯޓް މިނިސްޓްރީ ގުޅިގެން ކުރިއަށްގެންދާ މަސައްކަތެއް ކަމަށް އެޗްޑީސީއިން ވިދާޅުވިއެވެ.

މާލޭ ސަރަހައްދުގައި ޕާކިންގެ ދަތިކަން ބޮޑުވެފައިވާ މި ދަނޑިވަޅުގައި، ހުޅުމާލޭގައި ވަގުތީ ޕާކިން ސަރަހައްދުތަކެއް ކަނޑައެޅުމުގެ މައިގަނޑު ބޭނުމަކީ، ހުޅުމާލޭގެ ޓްރެފިކް ފްލޯ ރަނގަޅުކުރުމާއި، މަގުތަކުގައި ވެހިކަލްތައް ޕާކުކުރުމުގެ ސަބަބުން ދިމާވާ ތޮއްޖެހުން ކުޑަކުރުމެވެ. އެޗްޑީސީއިން ފާހަގަކުރެއްވި ގޮތުގައި، ހުޅުމާލެއިން މިފަދަ ބޮޑު ޖާގައެއް ހަމަޖެއްސުމަކީ މަގުތަކުގެ ތޮއްޖެހުން ކުޑަކުރުމަށް އެޅުނު މުހިންމު ފިޔަވަޅެކެވެ.

ކަނޑައަޅާފައިވާ ވަގުތީ ޕާކިން ސަރަހައްދުތަކާއި އެތަންތަނުން ލިބޭ ޖާގަތަކަކީ:

އެޗްޑީސީއިން ވިދާޅުވީ، މި ވަގުތީ އިންތިޒާމުގެ ސަބަބުން ހުޅުމާލޭގެ މަގުތަކުގެ ތޮއްޖެހުން ކުޑަވެ، ވެހިކަލްތަކަށާއި މަގު ބޭނުންކުރާ ހުރިހައި ފަރާތްތަކަށްވެސް ލުއިފަސޭހަވެ، ރައްކާތެރިކަން އިތުރުވާނެ ކަމަށެވެ. މީގެ އިތުރުން، މާލެ ސަރަހައްދުގެ ޕާކިން މައްސަލައަށް ދާއިމީ ހައްލެއް ހޯދުމުގެ ގޮތުން ޕާކިން ބިލްޑިން ތަކެއް ހެދުމުގެ މަސައްކަތްވެސް މިހާރު ކުރިއަށްދާ ކަމަށް އެޗްޑީސީއިން މައުލޫމާތު ދެއްވިއެވެ. މި ވަގުތީ ޕާކިން ސަރަހައްދުތަކުގެ ސަބަބުން އުޅަނދު ގެންގުޅޭ ފަރާތްތަކަށް ވަރަށް ބޮޑު ލުއިފަސޭހައަކަށް ވާނެ ކަމަށްވެސް އެޗްޑީސީއިން ވިދާޅުވިއެވެ.

ހުޅުމާލޭގެ ހަތަރު ސަރަހައްދެއްގައި 1964 އުޅަނދު ޕާކްކުރެވޭނެ ޖާގަ ގާއިމްކޮށްފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދުވެވަޑައިގެންފައިވާ ގޮތަށް ޖުޑީޝަލް ސާވިސް ކޮމިޝަން (ޖޭއެސްސީ) ގެ ކޮމްޕޮޒިޝަނަށް ބަދަލު ގެންނަވާނެ ކަމަށް ވިދާޅުވެއްޖެއެވެ. މިބަދަލާއެކު ޖުޑީޝަރީ ހަޤީޤީ މާނައިގައި މިނިވަން ކަމާއެކު މަސައްކަތް ކުރާތަން ފެނިގެންދާނެ ކަމަށް ރައީސް ވިދާޅުވިއެވެ.

ރައީސުލްޖުމްހޫރިއްޔާ މިހެން ވިދާޅުވީ، ރޭ ހެންވޭރުގެ ރައްޔިތުންނާ ބައްދަލުކުރައްވައި ޖުޑީޝަރީ ހަރުދަނާ ކުރުމަށް ކުރަމުންދާ މަސައްކަތްތަކުގެ މައުލޫމާތު ހިއްސާކޮށްދެއްވަމުންނެވެ. އެމަނިކުފާނު ވަނީ އަދުލު އިންސާފުގެ ދާއިރާއަށް ސަރުކާރުން ނުފޫޒު ނުފޯރުވާކަމަށް ތަކުރާރުކުރައްވާފައެވެ. ރައީސް ވިދާޅުވީ، ބަދަލު ހިފުމުގެ ރޫޙު އިސްކޮށް ސިޔާސީ އޮއިވަރުގެ ތެރެއިން ހިންގޭ އަނިޔާވެރި ޢަމަލުތަކަށް ޖާގަ ދިނުމަކީ އެމަނިކުފާނު ބޭނުންފުޅުވާ ކަމެއް ނޫންކަމަށެވެ.

ރައީސުލްޖުމްހޫރިއްޔާ ހާމަކުރެއްވި ގޮތުގައި، މިމަގަށް މަސައްކަތް ކުރުމަށް ޝަރުޢީ ދާއިރާގެ އެއްވެސް ފަރާތަކަށް ސަރުކާރުން ނުފޫޒެއް ނުފޯރުވައެވެ. އެމަނިކުފާނު ޔަޤީންކަން ދެއްވީ، ސިޔާސީ މީހެއް ހައްޔަރުކުރަން އެއްވެސް ފަނޑިޔާރަކަށް އެމަނިކުފާނު ނުވަތަ ސަރުކާރުގެ އެއްވެސް ފަރާތަކުން އެނގި ކަމަށް ނުބުނެވޭނެ ކަމަށެވެ.

ރާއްޖޭގައި ހެދިފައިވާ ޤާނޫނުތަކާއި ޚިލާފަށް މަސްތުވާތަކެތި ބޭނުން ކުރާ ފަރާތްތަކާއި މެދު ފިޔަވަޅު އެޅިގެންދާތަން ފެނުމަކީ ޝަރުޢީ ދާއިރާގެ މިނިވަންކަން ސާބިތުކޮށްދޭ އަލިގަދަ ހެއްކެއް ކަމަށް ރައީސް ވިދާޅުވިއެވެ.

"ކޯޓުތައް ހަޤީޤީ މާނައިގައި މިނިވަންކޮށްދޭ ގޮތަށް ހުރިހާ ކަމެއް ހިންގަމުން މިދަނީ. އެކަން އެބަ ފެނޭ މިހާރު ޑްރަގުގެ މީހުންނަށް ފިޔަވަޅު އަޅާއިރު، ނޫނިއްޔާ އެހެން ކަހަލަ ޢަމަލުތައް ހިންގާފައި ތިބޭ ފަރާތްތަކަށް ފިޔަވަޅު އަޅާއިރު، ހުކުމްތައް ކުރާއިރު، ކުރީގައި އަޅުގަނޑުމެން ބިރުން ފިޔަވަޅު ނާޅައި ތިބޭތަން ފެނުނީ،" ރައީސުލްޖުމްހޫރިއްޔާ ވިދާޅުވިއެވެ.

ރައީސް ވަނީ ޖުޑީޝަރީގެ މިނިވަންކަމަށް ކުރަން ހުރި މަސައްކަތްތައް ވަކި ތަރުތީބެއްގެ ތެރެއިން ކުރައްވާ ކަމަށް ވިދާޅުވެފައެވެ. އެމަނިކުފާނު މިކަމުގައި އިޝާރަތް ކުރެއްވީ ޖުޑީޝަލް ސާވިސް ކޮމިޝަނުގެ ކޮމްޕޮޒިޝަން ބަދަލު ކުރެއްވުމުގެ މަސައްކަތަށެވެ. 

ޖުޑީޝަލް ސާވިސް ކޮމިޝަންގެ ކޮމްޕޮޒިޝަނަށް ބަދަލު ގެނައުމަކީ ރައީސުލްޖުމްހޫރިއްޔާގެ ރިޔާސީ ވަޢުދެކެވެ.

"އިރާދަ ކުރެއްވިއްޔާ ޖުޑީޝަރީ މިނިވަން ވެގެންދާނެ. ކުރިއަށް އޮތްތާގައި އަޅުގަނޑު ވަޢުދުވީ ގޮތަށް ޖޭއެސްސީގެ ކޮމްޕޮޒިޝަންވެސް ބަދަލުކުރާނަން. އެކަމަށް ގެންނަ ޤާނޫނީ އިސްލާހުވެސް ހުށަހަޅާނަން. ކޮންމެ ކަމެއްވެސް އެކަމެއް އޮންނަ ތަރުތީބުން ކަންކަން ގެންދަން ޖެހޭނީ. ޖުޑީޝަރީ ހަޤީޤީ މާނައިގައި މިނިވަން ކަމާއެކު މަސައްކަތް ކުރާތަން ރައްޔިތުންނަށް ފެންނަން އެބަޖެހޭ. ދެން ހުންނަ ފިޔަވަޅުތައް އަޅާއިރުވެސް،" ރައީސުލްޖުމްހޫރިއްޔާ ވިދާޅުވިއެވެ.

ޖޭއެސްސީ މިހާރު އެކުލެވިގެންވަނީ 10 މެމްބަރުންގެ މައްޗަށެވެ. ޝަރުޢީ ދާއިރާގެ މިނިވަންކަން ކަށަވަރު ކުރުމަށް ސަރުކާރުން ގިނަ މަސައްކަތްތަކެއް ކުރަމުންދާއިރު، އަންނަ އަހަރުގެ ބަޖެޓުގައި ސެކްޓޯރަލް ބަޖެޓެއް ޝަރުޢީ ދާއިރާއަށް ހާއްސަކުރެއްވީ ދިމާވާ ގޮންޖެހުންތައް ހައްލުކުރުމަށެވެ. އަދި ދާދިފަހުން ދައުލަތުގެ މުވައްޒަފުންގެ މުސާރަ އެއްހަމަ ކުރުމުގެ ތެރެއިން މިދާއިރާގެ މުވައްޒަފުންގެ މުސާރައަށްވެސް ހެޔޮ ބަދަލެއް ވަނީ ގެނެސްފައެވެ.

ވަޢުދުވީ ގޮތަށް ޖޭއެސްސީގެ ކޮމްޕޮޒިޝަން ބަދަލުކުރާނަން: ރައީސް

މާލެ ސަރަޙައްދުގައި ދިމާވެފައިވާ ޕާކިންގެ ދަތިކަމަށް ދާއިމީ ހައްލެއް ހޯދުމަށްޓަކައި، އެ ސަރަޙައްދުގައި ޕާކިން ބިލްޑިންތަކެއް ތަރައްޤީކުރުމަށް އިންޑިއާގެ ލައިން އޮފް ކްރެޑިޓްގައި ހިމަނާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް ވިދާޅުވީ މި މަޝްރޫޢާ ގުޅޭ ލިޔެކިޔުންތައް އިންޑިއާގެ ސަރުކާރަށް މިހާރު ފޮނުވާފައިވާކަމަށެވެ.

މި މަޝްރޫޢުގެ ދަށުން މާލޭގައި 2 ޕާކިން ބިލްޑިން ތަރައްޤީކުރުމަށް ހަމަޖެހިފައިވާއިރު، މާލޭގެ އިތުރުން ވިލިމާލެއާއި ހުޅުމާލޭގައިވެސް ޕާކިން ބިލްޑިން ތަރައްޤީކުރެވޭނެއެވެ. ވިލިމާލޭގައި ޕާކިން ބިލްޑިންގ ތަރައްޤީކުރާނީ ބްރިޖުން ވިލިމާލެއަށް ފައިބާ ހިސާބުގައިކަމަށް ރައީސް ފާހަގަކުރެއްވިއެވެ. ހުޅުމާލޭގައި ޕާކިން ބިލްޑިންގ ތަރައްޤީކުރާނީ ގިނަ ބަޔަކަށް ފަސޭހަ ވާނެ ސަރަޙައްދެއްގައިކަމަށްވެސް ރައީސް ވިދާޅުވިއެވެ.

"ވިލިމާލެ ބްރިޖުން ފައިބާ ތަނުގައި ޕާކިން ބިލްޑިންއެއް އަޅާނެ. އެއީ ބްރިޖުން ވިލިމާލެއަށް ފައިބާއިރު އެތަނުގައި ޕާކު ކުރަންޖެހޭތީވެ. ހުޅުމާލެ ރަނގަޅު ލޮކޭޝަނެއްގައި އަނެއް ބިލްޑިން ތަރައްޤީކުރާނެ،" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސް ވިދާޅުވީ މަގުމަތީގައި ޕާކް ކުރުމުގެ މައްސަލައަށް އެދެވޭ ހައްލެއް ގެނައުމަށް ސީދާ ސަރުކާރުން މަސައްކަތް ކުރަމުން ގެންދާކަމަށެވެ. ޓްރެފިކް ޕޮލިސް މެދުވެރިކޮށް މަސައްކަތްތަކެއް ކުރަމުންދާއިރު، މިކަމަކީ އެންމެން ގުޅިގެން ކުރަންޖެހޭ މަސައްކަތެއްކަން ރައީސް ފާހަގަކުރެއްވިއެވެ. ޓްރެފިކް ޖޫރިމަނާ ބަހާލައިގެން ދެއްކުމުގެ އިންތިޒާމްވެސް ހަމަޖައްސާފައިވާއިރު، މިހާރުވެސް 1000 އެއްހާ މީހުން މި އުސޫލުގެ ދަށުން އެގްރީމަންޓް ހަދާފައިވެއެވެ.

މާލޭގެ ޓްރެފިކް މައްސަލައަށް ހައްލު ގެނައުމަށް ކުރައްވާ އިތުރު މަސައްކަތްތަކަށް އަލިއަޅުވާލައްވަމުން ރައީސް ވިދާޅުވީ މާލޭ މަގުތައް ރަނގަޅު ފެންވަރަށް ތަރައްޤީކުރުމަށް ފައިސާ ހަމަޖެހިފައިވާކަމަށެވެ. އެ މަސައްކަތް ކުރަނީ ޗައިނާ ސަރުކާރުގެ ހިލޭ އެހީގައިކަން ފާހަގަކުރައްވާ ރައީސް ވިދާޅުވީ މިހާރު ޑިޒައިންގެ މަސައްކަތްތައް ކުރަމުންދާކަމަށެވެ. އަދި އެ މަސައްކަތް ފެށުމުގެ ކުރިން ކުރެވެން ހުރި މަސައްކަތްތައް މިހާރުވެސް ފަށާފައިވާކަމަށް ވެސް އެމަނިކުފާނު ވިދާޅުވިއެވެ.

މި މަސައްކަތުގެ ދަށުން މާލޭ ބާޒާރު މަތި ތަރައްޤީކުރުމުގެ މަސައްކަތް ކުރައްވަމުން ގެންދަވާކަމަށާއި، އެސަރަޙައްދުގެ މަގު ތަރައްޤީކުރުމުގެ މަސައްކަތް ރޯދަ މަސް ނިމެންވާއިރަށް ނިންމާލުމަށް މަސައްކަތް ކުރައްވަމުން ގެންދަވާކަމަށް ރައީސް ވިދާޅުވިއެވެ. މިއާއެކު އެ ސަރަހާއްދަށްވެސް ބޮޑު ލުޔެއް ލިބިގެންދާނެކަން ރައީސް ވަނީ ފާހަގަކުރައްވާފައެވެ.

ޙަބަރު